Ағайынды Жұбановтардың мемориалдық музейі

Ембі қаласындағы алғашқы музей 1983 жылдың 15 ақпанында Қазақ КСР Халық депутаттары кеңесінің Мұғалжар аудандық атқару комитетінің шешімімен «Ахмет Жұбановтың мемориалдық музейі» ретінде ресми түрде ашылды. Бұл музей қазақтың көрнекті музыка зерттеушісі, композитор және қоғам қайраткері Ахмет Қуанұлы Жұбановтың өмірі мен шығармашылығын ұлықтау мақсатында құрылды.

2006 жылы академик Ахмет Жұбановтың 100 жылдық мерейтойына орай музей үшін заманауи архитектуралық талаптарға сай келетін, бір қабатты, мансардты үлгідегі жаңа ғимараттың құрылысы басталды. Бұл жаңа нысан 2009 жылдың сәуір айында пайдалануға берілді. Ғимараттың жобасы ұлттық нақыштағы элементтермен толықтырылған, келушілерге ыңғайлы заманауи экспозициялық кеңістіктермен жабдықталған.

Бүгінгі таңда Ағайынды Жұбановтар мемориалдық музейі - қазақ халқының көрнекті тұлғалары: музыка зерттеушісі әрі композитор Ахмет Жұбанов пен түрколог, филолог, педагог, профессор Құдайберген Жұбановтың ғылыми және шығармашылық мұрасын сақтау, зерттеу және насихаттау бағытында маңызды қызмет атқаратын мәдени-ағартушылық мекеме болып табылады. Сонымен қатар, музейде Жұбановтар әулетінің өзге де ұрпақтарының мәдениет пен ғылымға қосқан үлесі туралы мәліметтер ұсынылған.

Музейдің ғылыми экспозициясы Жұбановтар әулетінің қазақ музыкасы мен тіл біліміне қосқан өлшеусіз үлесін көрсетуге бағытталған. Экспозицияда Ахмет Жұбановтың музыкалық жазбалары, сирек қолжазбалар, фотосуреттер, жеке заттары, Құдайберген Жұбановтың ғылыми еңбектері, оқулықтары мен қолжазбалары кеңінен ұсынылған. Сонымен қатар, музей заманауи форматтағы ғылыми конференциялар, көрмелер, шығармашылық кездесулер, лекциялар мен шеберлік сағаттарын өткізу арқылы өңірдің мәдени өмірінің маңызды құрамдас бөлігіне айналып отыр. Музей қызметкерлері ғылыми-зерттеу, экскурсиялық және тәрбиелік бағыттағы іс-шараларды белсенді түрде жүзеге асырып, жастар арасында ұлттық мұраны құрметтеуге тәрбиелеуде.