Құмыра
Суреттер жүктелуде...
Сипаттама
Құмыра ашық қоңыр түсті саздан қыш шарығында айналдырып жасалып, күйдірілген. Пішіні сопақша, бүйірі шығыңқы, иық тұсы біртіндеп тарылып, созылыңқы тік мойынға ұласады. Түбі тегіс. Ауыз ернеуі сыртқа қарай сәл иілген. Мойынның жоғарғы бөлігінен иық тұсына жалғасқан доға тәрізді тұтқасы бар.
Ауыз ернеуінің төменгі жағында айналдыра көлденең сызық жүргізіліп, оның астына үшбұрыш пішінді қайталама өрнектер түсірілген. Иық тұсынан бүйіріне қарай айналдыра сегіз қатар көлденең сызық жүргізілген. Бүйірінің төменгі бөлігі толқын тәрізді және геометриялық өрнектермен безендірілген. Өрнектер күйдіруге дейін саздың бетіне қатты құралмен сызып және ойып түсірілген. Сыртқы бетінің жекелеген бөліктерінде қарайған іздер байқалады.
Құмыра сұйықтықты сақтауға және құюға арналған тұрмыстық ыдыс ретінде пайдаланылған. Тұтқасы ыдысты ұстау және сұйықтықты құю кезінде пайдалануға ыңғайластырылған.
Бұйым XIII-XIV ғасырлардағы Отырар алқабының керамика өндірісін, қыш ыдыс жасау технологиясын және геометриялық өрнектермен безендіру дәстүрін сипаттайтын археологиялық дерек болып табылады.