Чио-Чио-Сан рөліндегі Роза Жаманованың портреті

Сипаттама

Авторы: Исмаилова Гульфайрус Мансуровна. 1929-2013
Тігінен созылған композицияның ортасында, қабырға фонында сахналық бейнедегі кейіпкер жартылай бұрылған күйде тұр. Оның үстінде ақ кимоно, биік жиналған шашы ақ лентамен буылған, ал қолында - желпуіш. Жанында, еденде тәңірдің шағын мүсіні қойылған; фигураның екі жағы дәстүрлі жапон мотивтері салынған жылжымалы қалқалармен көмкерілген. Кейіпкердің тұлғасы мүсіндік тұтастықпен қабылданады, ондағы кейіптің, ишара мен сұлбаның айшықтылығы кейіпкердің эмоционалды кернеулі күйін ашуға ықпал етеді. Бет әлпеті мен жанар танымында жинақылық пен ішкі драматизм айқын берілген, бұл сахналық кейіпкердің күрделі эмоционалды құрылымын сезінуге мүмкіндік береді. Көркем бейненің маңызды бөлігіне айналған және оның театрлық табиғатын айшықтайтын костюмге ерекше мән берілген. Ақ, суық көк-жасыл және қызғылт-жосалы реңктердің үйлесіміне негізделген түстік шешім автордың театр саласындағы көпжылдық еңбегімен тығыз байланысты, оның кескіндемелік тіліне тән сәндік сипатпен де, байлығымен де ерекшеленеді.