А. Иманов атындағы Амангелді Мемориалдық музейі
А.Иманов атындағы Амангелді мемориалдық музейі - Қостанай облысындағы тарихи-мәдени мекемелердің бірі ретінде ел тарихындағы маңызды тұлға - ұлт-азаттық қозғалыстың жетекшісі, 1916 жылғы Торғай көтерілісінің басшысы Амангелді Имановтың өмірі мен күрес жолын насихаттауға бағытталған мамандандырылған музей болып табылады.
Аталған музей 1969 жылғы 9 желтоқсанда Қазақ КСР Министрлер Кеңесінің өкімі негізінде ресми түрде құрылды. Алғашқыда музей Советская көшесінде (қазіргі - М. Дулатов көшесі) орналасқан шағын саман үйінде ашылған болатын. Жергілікті тұрғындардың, аудандық партия комитеті мен атқарушы органдардың қолдауымен 1976 жылы музей жаңа ғимаратқа көшірілді. Бұл ғимарат екі қабатты, кеңейтілген экспозициялық және әкімшілік құрылымға ие. 2013 жылғы 12 қазандағы №438 Қостанай облысы әкімінің қаулысы негізінде мекеменің мәртебесі өзгертіліп, ол «А.Иманов атындағы Амангелді мемориалдық музейі» коммуналдық мемлекеттік мекемесі ретінде тіркелді.
Музейдің құрылтайшысы және уәкілетті органы - «Қостанай облысы әкімдігінің мәдениет басқармасы» мемлекеттік мекемесі болып табылады. Мекеме өз қызметін осы орган бекіткен даму стратегиясына, мемлекеттік мәдени саясатқа және перспективалық жоспарларға сәйкес жүзеге асырады.
Музей ғимараты - екі қабаттан тұрады. Экспозициялық залдар мазмұнына қарай келесі бағыттарға бөлінеді:
Амангелді Имановтың өмірі мен қызметіне арналған залдар - оның 1916 жылғы ұлт-азаттық көтерілістегі жетекші рөлі, әскери-стратегиялық әрекеттері мен халықтық қолдауы туралы деректер ұсынылған.
Аудан тарихына арналған 4-ші зал - Амангелді ауданының әлеуметтік, экономикалық және мәдени дамуын, тарихи оқиғаларын қамтиды.
Музей алғаш құрылған кезде қорында 235 экспонат болса, қазіргі таңда олардың саны 5808 бірлікті құрайды. Барлық экспонаттар ғылыми сараптамадан өткізіліп, арнайы тіркеу кітабына енгізіледі. Музей қоры негізінен келесі топтамалардан тұрады: тарихи құжаттар мен фотосуреттер, тұрмыстық және этнографиялық бұйымдар, қару-жарақ үлгілері, кітаптар мен баспасөз материалдары.
Музей ғылыми-ағартушылық бағытта жұмыс атқарады. Мұнда оқушыларға, студенттерге, зерттеушілер мен келушілерге арналған дәрістер, экскурсиялар, уақытша көрмелер ұйымдастырылады.