Өнертанушы Л. Хлопованың портреті

Сипаттама

Авторы: Исмаилова Гульфайрус Мансуровна. 1929-2013
Камерлік портретте түрлі-түсті иллюстрациялармен безендірілген қабырға фонында жас қара шашты әйел бейнеленген. Модельдің кейпі жақыннан, белге дейін тұтас көрсетіліп, жағын қос алақанымен тіреп отыр. Нұрлы жүзі композицияның басты тональды әрі мағыналық түйініне айналған, ал көрерменнен тысқары бағытталған сабырлы, ойлы жанары кейіпкердің ішкі сырын, психологиялық болмысын айшықтай түседі. Кейіпкердің кәсіби қызметін көрсететін ерекше мағыналық акцент оның артқы жағында ілінген өнер туындылары арқылы берілген. Бас киімнің жылы, жосалы-алтын түсі мен ашық сары көйлек түндей қара фонмен және иығына жамылған тонмен контраст құрып, мәнерлі колористикалық ырғақ қалыптастырады. Пішіннің жұмсақ сомдалуы бет-әлпеттің, қолдың және әшекейлердің мұқият өңделген бөлшектерімен үндесіп, бейненің заттық айқындылығын күшейтеді.