Монета

Сипаттама

Күмістен соғылған дөңгелекке жуық пішінді монета. Жиегі біркелкі емес, кей тұстары мүжілген және жарылған. Екі бетінде де араб графикасымен орындалған эпиграфикалық жазулар сақталған.
Монетаның бір бетінің ортасында үш шеңберден құралған Әмір Темірге тән тамға бейнеленген. Тамғаның айналасында араб графикасындағы жазулар орналасқан. Екінші бетінде эпиграфикалық жазулар геометриялық композиция түрінде берілген. Жазулардың жекелеген бөліктері соғылу ерекшелігі мен ұзақ уақыт айналымда болуына байланысты көмескіленген.
Монета Әмір Темір билігі кезеңіндегі Темір әулеті мемлекетінің ақша айналымына жататын күміс танга болып табылады. Үш шеңберлі тамға Әмір Темірдің монеталарында билеушілік айырым белгісі ретінде қолданылған. Әмір Темір дәуіріндегі негізгі күміс танганың салмақтық стандарты шамамен 6,2 г болған, ал аталған дананың салмағы 6,03 г, бұл оны танга номиналына жатқызуға мүмкіндік береді.
Монета Құйрықтөбе қалажұртынан табылған көмбе құрамынан шыққан. Жәдігер XIV ғасырдың соңы - XV ғасырдың басындағы Отырар өңірінің ақша айналымын, Темір әулеті дәуіріндегі экономикалық байланыстарды және ортағасырлық нумизматикалық таңбалар жүйесін зерттеуде маңызды археологиялық және нумизматикалық дерек болып табылады.